ICAO-ն ՌԴ-ին ճանաչել է Malaysia Airlines-ի Boeing 777-ի կործանման մեղավոր

Միջազգային քաղաքացիական ավիացիայի կազմակերպության (ICAO) խորհուրդը պաշտոնապես Ռուսաստանին ճանաչել է՝ որպես 2014 թվականին Դոնբասի վրայով MH17 չվերթի կործանման պատասխանատու, հայտնում է Նիդերլանդների արտաքին գործերի նախարարությունը։

ICAO-ի խորհրդի կարծիքով, Ռուսաստանն իր գործողություններով խախտել է Չիկագոյի միջազգային քաղաքացիական ավիացիայի մասին կոնվենցիան, մասնավորապես՝ դրա այն դրույթը, որն արգելում է թռիչքի ժամանակ քաղաքացիական ինքնաթիռների դեմ զենքի օգտագործումը։ Առաջիկա շաբաթներին ICAO-ի խորհուրդը կքննարկի այն հարցը, թե ինչպես պետք է Ռուսաստանը փոխհատուցի վնասը։

2022 թվականի մարտին Ավստրալիան և Նիդերլանդները, որոնց քաղաքացիները կազմում էին ինքնաթիռի վթարի հետևանքով զոհվածների մեծամասնությունը, Ռուսաստանի դեմ բողոք են ներկայացրել ICAO-ին։ 2024 թվականի հունիսին Ռուսաստանը հայտարարեց, որ դադարեցնում է մասնակցությունը բողոքի քննարկմանը, քանի որ չի ճանաչում ICAO-ի իրավասությունն այս գործում։

Միջազգային քննչական խումբը, որի կազմում էին Ավստրալիայի, Բելգիայի, Մալայզիայի, Նիդերլանդների և Ուկրաինայի ներկայացուցիչներ, եզրակացրեց, որ ինքնաթիռը խոցվել է ռուսամետ անջատողականների կողմից՝ օգտագործելով Ռուսաստանից վերջերս ներմուծված «Բուկ» հակաօդային պաշտպանության համակարգը։ 2022 թվականի նոյեմբերին Նիդերլանդների դատարանը հեռակա կարգով ցմահ ազատազրկման դատապարտեց անջատողական «ԴԺՀ» նախկին պաշտպանության նախարար Իգոր Ստրելկովին և ևս երկու անձի՝ ինքնաթիռը դիտավորյալ ոչնչացնելու և կանխամտածված սպանության մեղադրանքով։ Գործով մեկ այլ մեղադրյալ արդարացվեց։

Malaysia Airlines-ի Boeing 777-ը Դոնբասի երկնքում խոցվեց 2014 թվականի հուլիսին։ Արդյունքում զոհվեց 298 մարդ։