«Երկխոսության կամուրջներ կառուցենք հանուն խաղաղության». Հռոմի պապի առաջին ուղերձը

Ինչպես հայտնել ենք, Չիկագոյում ծնված կարդինալ Ռոբերտ Ֆրենսիս Փրևոսթն ընտրվել է Հռոմի նոր պապ՝ վերցնելով Լևոն 14-րդ անվանումը:

Նա ամերիկա-պերուացի կարդինալ է։ Ինչպես նշում է CNN-ը, նա դարձել է պատմության մեջ առաջին պապը Միացյալ Նահանգներից։ Նա 69 տարեկան է։

Իր առաջին ելույթում Հռոմի պապը կոչ է արել երկխոսության կամուրջներ կառուցել հանուն խաղաղության։ «Եղբայրներ և քույրեր, սրանք հարություն առած Քրիստոսի՝ կյանքի տվողի առաջին խոսքերն են։ Ես դիմում եմ բոլոր երկրներին, բոլոր ժողովուրդներին. թող խաղաղություն լինի ձեր մեջ։ Հարություն առած Քրիստոսը խաղաղություն բերեց բոլորի համար, այն գալիս է Աստծուց, որը սիրում է մեզ բոլորիս անվերապահ սիրով։ Մենք լսում ենք Հռոմի պապ Ֆրանցիսկոսի քաջարի ձայնը, որը օրհնեց Հռոմը և ամբողջ աշխարհը»,- ասել է պապը։

Հռոմի պապ Լևոն 14-րդը նաև կոչ արեց մարդկանց՝ «լինել մեկ ժողովուրդ» և նշեց, որ Ֆրանցիսկոս պապի կյանքի վերջին օրերի թույլ ձայնը դեռևս լսվում է աշխարհում։