«Իրենք «էշի մռութը պաչել են», էսօր ասում են՝ Սերժն է բերել Նիկոլին»․ Նաիրա Զոհրաբյան

«24Նյուզ»-ի հետ զրույցում հասարակական-քաղաքական գործիչ Նաիրա Զոհրաբյանը, անդրադառնալով Սերժ Սարգսյանի վերջին հայտարարությանը և ՀՀԿ-ին ուղղված քննադատություններին, ընդգծեց. «Ես անմիջական մասնակիցն եմ եղել, կիզակետում եմ եղել 2018-ի իրադարձության, և այն քաղաքական ուժը, որը ես ներկայացրել եմ, աջակիցն է եղել հեղափոխության, ինքս տեսել եմ հրապարակում տարբեր մարդկանց, ովքեր հիմա ծակերից դուրս են գալիս և հայտարարում՝ Սերժն ա բերել Նիկոլին։ Իրենք գնացել, հրապարակում «էշի մռութը պաչել են», և էսօր հայտարարում են, թե Սերժն է բերել Նիկոլին։ Երբ որ մարդիկ փորձում են փախչել փաստերից, դա իրենց չի ազատում պատասխանատվությունից։

Եթե մարդը 18 թվականի ապրիլի 22-ի հարցազրույցում կոչ է անում Սերժ Սարգսյանին՝ անհապաղ ազատել Նիկոլ Փաշինյանին, իսկ երեկ եթերից հայտարարում է, թե այն, որ Նիկոլին ազատեցին, դա արդեն չափորոշիչ է, որ Սերժ Սարգսյանն է բերել Նիկոլին, դա արդեն ոչ միայն ադեկվատության ու քաղաքական քթածակի հարց է, այլ նաև բարոյականության»։