«Էդգար Ղազարյանին լռեցնել հնարավոր չէ»․ Մենուա Սողոմոնյան

«Դատական համակարգը բարեբախտաբար ոչ ամբողջությամբ է բռնազավթված, պետական իշխանության մյուս ճյուղերը ուզուրպացված են մեկ անձի կողմից, դատական իշխանությունը մասամբ է ուզուրպացված»,- այս մասին այսօր լրագրողների հետ զրույցում նշեց միջազգային հարաբերությունների մասնագետ «ՀայաՔվե»-ի անդամ Մենուա Սողոմոնյանը։

Նրա խոսքով՝ ի պատիվ որոշ դատավորների, ովքեր պահպանում են իրենց մասնագիտական էթիկան, կոչումը, երբեմն-երբեմն տեղի են ունենում արդար դատավարություններ։

Անդրադառնալով քաղաքական-հասարակական գործիչ Էդգար Ղազարյանի դեմ հարուցված դատական գործին և հրապարակային քննադատական խոսքի համար մեղադրանք առաջադրելուն՝ Սողոմոնյանն ընդգծեց․ «Մենք այստեղ ենք նաև՝ դատավորներին հիշեցնելու իրենց կոչման և անաչառությունն իրենց համար որպես ուղենիշ սահմանելու մասին։ Մեր հույսերը մեծ չեն, հասկանալի է, որ դատախազության նախաձեռնված գործընթացը նրա համար է, որ Էդգար Ղազարյանը չխոսի, բայց նրան լռեցնել հնարավոր չէ՝ ինչպես և շատ այլ արժանապատիվ մարդկանց։ Պետք է նրանք հասկանան, որ կան բարձր արժանապատվություն ունեցող մարդիկ, որոնց վախը կապված է հայրենիքի ապագայի, ինքնիշխանության կորստի, թուրքացման վտանգի, արժանապատվության և ինքնության կորստի հետ։ Դրա համար անձնական շարժառիթներով վախեցնելը իսկական մտավորականների, արժանապատիվ մարդկանց համար ոչ թե վախ է, այլ նրանք այդ հալածանքները ընդունում են որպես պատիվ և աննկուն ձևով շարունակում են իրենց աշխատանքը»։