Քաղաքագետ Հայկ Մարտիրոսյանը ֆեյսբուքյան իր էջում գրում է. «Սամվել Բաբայանը կեսը 100%-ով ճիշտ է ասում, կեսն էլ՝ 100%-ով բացարձակապես ստում է: Ստում է, թե Ադրբեջանը պատրաստ էր Արցախին ինքնավարություն տալ: Չգիտեմ, թե ում հետ է ինքը բանակցել և թե որպես ով է բանակցել, բայց Ալիևը երբեք և երբևէ դրան պատրաստ չի եղել, հատկապես՝ 2020-ի բացարձակ հաղթանակից հետո: Ճշմարտությունը խոսելով Ռուսաստանի ու նրա հայաստանյան գործակալական ցանցի մասին՝ Սամվել Բաբայանը միաժամանակ լվանում է Փաշինյանի ռեժիմը և զերծ պահում նրան Արցախը հանձնելու պատասխանատվությունից: Անմաքուր կերպով նաև Ռուսաստանին զերծ է պահում Արցախը հանձնելու պատասխանատվությունից, թեև սկսել է մեղադրել Ռուսաստանին և մեղադրում է արդարացիորեն: Ճիշտ է ասում, որ հայերն ադրբեջանցիներին ահռելի, աննկարագրելի քանակությամբ լրջագույն զենքեր են հանձնել: Ճիշտ է ասում, որ ողջ Արցախի արխիվը ռեժիմը վառել է՝ այսինքն պատմաբանների և պատասխանատվության կանչողների համար առհավետ փակել են ճշմարտության ծալքերն իմանալու և լինի իրավական կամ պատմական դատաստանի առջև կանգնեցնելու հնարավորությունը: Ճիշտ է ասում, որ ԱՄՆ-ի շահերից է բխում, որ Հայաստանը մնա և պաշտպանված լինի: Խոսելով Արցախի ողջ ղեկավարության՝ ռուսական էժանագին գործակալ լինելու մեջ՝ ամենևին չի անդրադառնում Փաշինյան-Մոսկվա կապին: Բաբայանը, մի խոսքով, իր խաղն է խաղում: Ու այստեղ ամենաանկարևոր հարցն այն է՝ թե ինքն ինչպես է անցել անցակետը: Եվ այդ անկարևորում կարևոր միակ բանն այն է, որ իր այդ բացահայտումից և անցնելու փաստն անմիջապես հանրայնացնելուց հետո Բաքուն հաստատ ամեն բան կանի, որ իր ցուցակի մյուս դեմքերն արդեն հաստատ գերեվարվեն: Թե ինչ հարց է դրանով լուծում Բաբայանը, հեշտ չէ կռահելը: Բայց կռահել կարելի է: Մի խոսքով՝ կեղտոտ ու դավաճան են բոլորը: Եվ ամենաստոր ու ամենապիղծ դավաճանն այս ժողովուրդն է, որ այդքան պիղծ ու դավաճան է ծնել և որ այդքան պղծորեն ու դավաճանաբար անտարբեր է իր հայրենիքի ճակատագրի հանդեպ»:
