«Ականջներդ փակեք, երբ ապրիլի 24-ին խոսում են տարբեր պետությունների ղեկավարներն ու դեսպանները». Արմեն Այվազյան

Մատենադարանի ավագ գիտաշխատող Արմեն Այվազյանի գրառումը․ «Ականջներդ պինդ փակեք, երբ ապրիլի 24-ին լսում եք Հայոց ցեղասպանության մասին տարբեր պետությունների ղեկավարների և դեսպանների կեղծավոր ու անարժեք խոսքերը։
Մեծ հույսեր ունեմ, որ նրանց սրտաճմլիկ խոսքերին ու փարթամ ծաղկեփնջերին մեզանում լուրջ վերաբերվողների թիվը կտրուկ պակասել է։ Հատկապես անտանելի է, երբ հայտարարում են, թե իբր իրենք ամեն ինչ անում և անելու են նման ոճրագործությունների կրկնությունը թույլ չտալու համար։
Այնինչ 2020 թ. աշնանից մինչև այսօր նույն այդ տարբեր պետությունների ղեկավարներն ու դեսպաններն իրենց աչքն ու ականջը փակել են ու չտեսնելու են տալիս Հայոց ցեղասպանության հերթական, մերօրյա փուլը։ Չեն տեսնում ադրբեջանաթուրքական վայրագությունները, հայերի բռնագաղթն ու հայրենազրկումը, հայկական հողերի բռնազավթումը, հայոց եկեղեցիների կործանումն ու հայոց գերեզմանատների պղծումը...
Դա դեռ քիչ է, այս մեղրաբերանները զուգահեռաբար գովերգում են ՀՀ դրածո կոլաբորացիոնիստական իշխանություններին և նրանց բռնած կործանարար, կապիտուլյացիոն ուղեգիծը, որը մեզ տանում է ուղիղ դեպի ցեղասպան Թուրքիայի երախը՝ դեպի արագընթաց գաղութացում և թուրքացում...
Ականջներդ փակեք, երբ ապրիլի 24-ին խոսում են տարբեր պետությունների ղեկավարներն ու դեսպանները։
Փոխարենը զօրուգիշեր պետք է խորհենք, թե ինչպե՞ս, ի՞նչ հնարավոր եղանակներով, ի՞նչ անհնար հնարքներով ենք ի վերջո կառուցելու մեր ազգային պետությունը, մեր ազգային բանակը, մեր ազգային հատուկ ծառայությունները, մեր ազգային վերնախավը, մեր ազգային դպրոցն ու կրթությունը։
ԿԵՑՑԵ՛ ՀԱՅԱՍՏԱՆ»: