Երևան`   +26 °C
Այսօր`   Երեքշաբթի, 11 օգոստոսի, 2020 թ.

«Իսկ դուք կներե՞ք ձեզ ունեզրկողներին, սպանողներին, թալանողներին». Արտակ Գալստյան

399
Կիրակի, 05 հուլիսի, 2020 թ., 03:15
«Իսկ դուք կներե՞ք ձեզ ունեզրկողներին, սպանողներին, թալանողներին». Արտակ Գալստյան

Դատական փորձագետ Արտակ Գալստյանը ֆեյսբուքյան իր էջում գրել է. «Լուսահոգի պապս, երբ թոռներով չարություն էինք անում, իսկ բացահայտվելուց հետո ներողություն էինք խնդրում, միշտ հակադարձում էր. «Ներեմ, կրկին կանեք»:
Ինչո՞ւ հիշեցի պապիս այս խոսքերը:
Երեկ Արթուր Վանեցյանը կրկնելով արդեն Սոչի քաղաքի խոհանոցում թաքնված Միքայել Մինասյանի խոսքերը, հանդես եկավ համերաշխության կոչով, որում մասնավորապես նշել է. «Եթե չլինի համերաշխություն, Հայաստանի Հանրապետությունը դատապարտված է...: Փոթորկին պետք է հաջորդի խաղաղությունը, քաոսին՝ կարգը, իսկ խելահեղությանը՝ բանականությունը»:
Այլ կերպ ասած, բոլորին ներենք և անցնենք առաջ:
Ներենք և մոռանանք ժողովրդի 20 տարվա ստրկությունը, ունեզրկումը, սպանությունները, արտագաղթը, ապօրինի դատապարտումները, խեղված ճակատագրերը, մարտի 1-ի, ապրիլյան քառօրյայի զոհերին, քաղաքական սպանությունները և այլն:
Ուշագրավը այն է, որ Վանեցյանը, հավանաբար, ինքն էլ չնկատելով, նշել է այն պարտադիր նախապայմանը, որից հետո պետք է սկսվի ներումը՝ հանդուրժողականությունը:
Դա փոթորիկն է:
Հեղափոխության փոթորիկը պետք է ապահովեր պատժի անխուսափելիության և բումերանգի անխափան գործող օրենքը, որը կբավարարեր հասարակությանը և նոր դրանից հետո կլիներ ներում:
Ցավոք, հեղափոխական փոթորիկ տեղի չունեցավ նաև ԱԱԾ-ն նախկինում ղեկավարող Վանեցյանի մեղքով:
Բացի այդ՝ Վանեցյանը, հավանաբար, մոռացել է, որ ներում շնորհում են նրան, ով դա խնդրում է, իսկ նախկինները մինչ օրս պնդում են, որ իրենք էլիտա են, ազնվականներ և ճիշտ են, որ կոտորել են, սպանել, ունեզրկել:
Կցանկանայի մի հարց տալ Արթուր Վանեցյանին և իր պես մտածողներին. իսկ դուք կներե՞ք ձեզ ունեզրկողներին, սպանողներին, թալանողներին, արտաքսողներին, հոգեպես և ֆիզիկապես խոշտանգողներին, որոնք պնդում են որ ճիշտ են արել ու ներում չեն հայցում:
Միանշանակ ոչ, դուք նույնիսկ չեք ներում ժողովրդին՝ սեփականատիրոջը, որը ձեզնից պահանջում է իրենից գողացվածը:
Այնպես որ Արթուր, ներում և համերաշխություն կլինի, բայց փոթորիկից հետո, ի դեպ՝ դա ամրագրված է նաև ֆիզիկայի օրենքներով:
Հուկի օրենք. այն ուժը, որն առաջանում է մարմնի դեֆորմացիայի ժամանակ, խոչընդոտում է դեֆորմացիային և ձգտում վերականգնել մարմնի ձևն ու չափերը, կոչվում է առաձգականության ուժ:
20 տարի ժողովուրդը սեղմվել է օկուպանտների կողմից, առանառանձգականության ուժի օրենքով ժողովուրդը պետք է վերականգնվի իր նախկին դիրքին:
Նյուտոնի երրորդ օրենք. Ազդեցությունը հավասար է հակազդեցությանը:
Օկուպանտների կողմից հայ ժողովրդի նկատմամբ կիրառված 20 տարվա ազդեցությունը պետք է ստանա հավասար հակազդեցություն, հենց սա է Արթո՛ւր, քո նշած փոթորիկը:
Այնպես որ Արթո՛ւր, կրկնում եմ, ներում և համերաշխություն կլինի, բայց փոթորիկից հետո, որը, միևնույն է, տեղի է ունենալու:
Իսկ եթե ներենք առանց փոթորիկ, ապա կրկին կանեք»: