Աշխարհի ամենահարուստ մարդիկ մեկ շաբաթում կորցրել են 444 մլրդ դոլար․ #Bloomberg

Ամբողջ աշխարհում ֆոնդային ինդեքսների անկումը հանգեցրել է նրան, որ վերջին մեկ շաբաթվա ընթացքում մոլորակի 500 ամենահարուստ մարդիկ կորցրել են 444 մլրդ դոլար, հայտնում է Bloomberg-ը՝ հիմնվելով իր հաշվարկների վրա: Այս տարվա սկզբից կորուստները զգալիորեն գերազանցել են բոլոր եկամուտները:

Ամենամեծ կորուստներն ունեցել է Amazon կորպորացիայի ղեկավար Ջեֆ Բեզոսը՝ 11,9 մլրդ դոլար, 10 միլիարդ դոլար կորցրել է Microsoft–ի գլխավոր տնօրեն Բիլ Գեյթսը, 9 միլիարդ դոլար կորցրել է ֆրանսիական LVMH (Louis Vuitton Moet Hennessy) ընկերությունների խմբի գլխավոր տնօրեն Բեռնար Առնոն։
Կորուստներ է ունեցել նաև Իլոն Մասկը: Նա կորցրել է 9 մլրդ դոլար՝ Tesla-ի բաժնետոմսերի անկման պատճառով: Bloomberg-ը նշում է, որ աշխարհի ամենահարուստ մարդկանց 80%-ն ունեցվածքի կորուստ է ունեցել: Նրանց կորուստների մեծ մասը կապված է աշխարհում կորոնավիրուսի տարածման և Չինաստանում ստեղծված իրավիճակի հետ: Կորոնավիրուսն անմիջականորեն վնասել է Carnival Corp-ի ղեկավարին՝ Միկի Արիսոնին, ում պատկանում է Diamond Princess զբոսանավը, որտեղ հինգ մարդ մահացել է կորոնավիրուսից: Միայն վերջին շաբաթվա ընթացքում նա կորցրել է 1 միլիարդ դոլար:

Ավելի վաղ ռուսական Forbes-ը հաղորդել էր, որ հինգ հարուստ ռուսաստանցիների հարստությունը աշխարհում կորոնավիրուսի տարածման հետևանքով, նվազել է օրական 6 միլիարդ դոլարով: Ամենաշատը կորցրել է «Լուկօյլ» ընկերության նախագահ Վագիթ Ալեքպերովը՝ 1,6 միլիարդ դոլար, «Ինտերռոս» հոլդինգային ընկերության նախագահ Վլադիմիր Պոտանինը՝ 1.4 միլիարդ դոլար, «Նովատէկ» ընկերության համասեփականատեր Լեոնիդ Միխելսոնը՝ 1,2 մլրդ դոլար: