ԱՄՆ Սենատը հաստատել է «Հյուսիսային հոսք-2» գազատարի դեմ պատժամիջոցները

ԱՄՆ Սենատը ընդունել է Պենտագոնի 2020թ․ բյուջեի նախագիծը, որը պատժամիջոցներ է սահմանում «Հյուսիսային հոսք-2» գազատարի դեմ, հայտնում է Սենատի կայքը։ ԱՄՆ պաշտպանական բյուջեի չափը կազմում է 738 միլիարդ դոլար։ Նախագծին կողմ է քվեարկել 61 սենատոր, դեմ՝ 6-ը: Նախագիծը նախատեսում է սահմանափակումներ կիրառել նաև արտասահմանյան այն ընկերությունների դեմ, որոնք նավեր են տրամադրում «Հյուսիսային հոսք-2»-ի կառուցման համար։ Պենտագոնի 2020թ․ բյուջեի նախագծում ներառվել են նաև Ռուսաստանի «ագրեսիան կասեցնելու դեմ» մի շարք այլ միջոցառումներ: Մասնավորապես, Ուկրաինային օգնության տրամադրումը՝ զենքի մատակարարումը, ինչպես նաև Թուրքիային ամերիկյան F-35 կործանիչների տրամադրման արգելքը։ Այս քայլը պայամանվորված է Թուրքիայի կողմից ռուսական ՀՕՊ համակարգերի ձեռք բերման հետ։

Պենտագոնի 2020թ․ բյուջեի նախագիծը կուղարկվի ԱՄՆ նախագահ Դոնալդ Թրամփի ստորագրությանը:
Ներկա պահին «Գազպրոմ» ընկերությունը չի կարող նշել «Հյուսիսային հոսք-2»-ի կառուցման ավարտի ժամկետները։