Ներդրողները դատի են տվել Facebook-ին՝ տվյալների արտահոսքի հետ կապված սկանդալի պատճառով

ԱՄՆ-ում Facebook ընկերության դեմ դատական հայց են ներկայացրել՝ բրիտանական Cambridge Analytica վերլուծական ընկերության հետ սկանդալի պատճառով: Հայցի ներկայացման մասին հայտնում է CNN հեռուստաալիքը:

Հեռուստաալիքը նշում է, որ խմբային հայց է ներկայացվել ԱՄՆ Քալիֆորնիա նահանգի Սան Ֆրանցիսկոյի դաշնային դատարան Facebook-ի բաժնետեր Ֆան Յանի և ներդրողների անունից, ովքեր բաժնետոմսեր են գնել ընկերությունում 2017թ. փետրվարի 3-ից 2018թ. մարտի 19-ն ու զգալի ֆինանսական կորուստներ կրել սկանդալի պատճառով:

«Անօրինական գործողությունների և ընկերության բաժնետոմսերի շուկայական գնի կտրուկ անկման արդյունքում հայցվորները զգալի կորուստ են կրել»,- ասվում է հայցում: Հայցվորները պահանջել են փոխհատուցում վճարել ներդրողներին, սակայն փոխհատուցման չափը չի նշվում: