«ԱՄՆ-ն ուժեր է տեղափոխում Մերձավոր Արևելք»․ #WSJ

ԱՄՆ-ն արագացված կերպով Մերձավոր Արևելք է տեղափոխում զորքեր, բուժանձնակազմ և սպառազինություն՝ ԱՄՆ նախագահ Դոնալդ Թրամփին Իրանի հետ հակամարտության ընդլայնման դեպքում ավելի հզոր ռազմական հնարավորություններ ընձեռնելու համար, հայտնում է The Wall Street Journal-ը՝ հղում կատարելով իրավիճակին ծանոթ աղբյուրներին։

Ամերիկացի պաշտոնյաների խոսքով՝ վերջին շաբաթվա ընթացքում, մասնավորապես, տարածաշրջան են տեղափոխվել հատուկ նշանակության ուժեր, լիցքավորող ինքնաթիռներ, ինչպես նաև Գերմանիայի «Շպանգդալեմ» ավիաբազայից F-16 կործանիչների և Անգլիայի «Լեյքենհիտ» ավիաբազայից F-35 կործանիչների էսկադրիլիաներ։

Բացի այդ, աղբյուրների հաղորդմամբ՝ վերջին օրերին Գերմանիայի Լանդշտուլ քաղաքում գտնվող տարածաշրջանային բժշկական կենտրոն է ժամանել ավելի քան 150 բուժաշխատող։ Այս հիվանդանոցը հանդիսանում է Մերձավոր Արևելքում մարտական գործողությունների հետևանքով վիրավորում ստացած զինծառայողներին օգնություն ցուցաբերելու հիմնական կենտրոնը։

Ինչպես նշում է լրատվամիջոցը, այս նախապատրաստությունները վկայում են, որ Թրամփը դիտարկում է հետագա էսկալացիայի հնարավորությունը։ Ավելի վաղ ԱՄՆ նախագահը խստացրել է իր հռետորաբանությունը Իրանի նկատմամբ՝ հայտարարելով, որ կարող է հրաման տալ գրոհելու Քոլանգ լեռը (Pickaxe), որտեղ, ինչպես ենթադրվում է, Իրանի իշխանությունները թաքցրել են ուրանի հարստացման համար նախատեսված ցենտրիֆուգները։