«ՌԴ-Ուկրաինա բանակցությունները կարող են տեղի ունենալ հուլիսի 23-24-ը՝ Ստամբուլում»․ #Independent

Ռուսաստանի և Ուկրաինայի միջև բանակցությունների երրորդ փուլը կարող է տեղի ունենալ հուլիսի 23-ին կամ 24-ին՝ Ստամբուլում: Այս մասին հաղորդում է «Independent Türkçe» թերթը՝ հղում անելով աղբյուրներին։

«Այս շաբաթ Ստամբուլում սպասվում է Ռուսաստանի և Ուկրաինայի պատվիրակությունների հանդիպում: Բանակցությունները կարող են տեղի ունենալ չորեքշաբթի կամ հինգշաբթի: Պատվիրակության վայրի, ժամանակի և կազմի մասին տեղեկատվությունը չի հրապարակվում», - գրում է թերթը։

Լրատվամիջոցի տվյալներով՝ ուշադրության կենտրոնում կլինեն այնպիսի հարցեր, ինչպիսիք են մարդասիրական օգնությունը, գերիների փոխանակումը, ենթակառուցվածքների անվտանգությունը և սահմանային անվտանգության միջոցառումները։

Ակնկալվում է նաև, որ Եվրոեռյակը (Ֆրանսիան, Մեծ Բրիտանիան և Գերմանիան) ուրբաթ Ստամբուլում բանակցություններ կվարի նաև Իրանի ներկայացուցիչների հետ՝ միջուկային հարցերի շուրջ։

Ավելի վաղ Ուկրաինայի նախագահ Վլադիմիր Զելենսկին առաջարկել էր բանակցությունների նոր փուլ՝ նշելով, որ Ուկրաինան պատրաստ է նման հանդիպման։