ՌԴ-ում ձերբակալված ադրբեջանցիների մահվան հետ կապված՝ Ադրբեջանում քրգործ է հարուցվել

Ադրբեջանի գլխավոր դատախազությունը քրեական գործ է հարուցել Եկատերինբուրգում ձերբակալված երկու ադրբեջանցիների մահվան կապակցությամբ։

Գլխավոր դատախազության տվյալներով՝ քրեական գործը հարուցվել է Ադրբեջանի ՔՕ մի շարք հոդվածներով, այդ թվում՝ «Մի խումբ անձանց կողմից կատարված դիտավորյալ սպանություն», «Առանձնակի դաժանությամբ կամ ընդհանուր առմամբ վտանգավոր եղանակով կատարված դիտավորյալ սպանություն», «Պաշտոնեական լիազորությունների չարաշահում, որը հանգեցրել է ծանր հետևանքների»։

Ավելի վաղ Ադրբեջանի ԱՆ դատաբժշկական փորձաքննության և ախտաբանական անատոմիայի ասոցիացիայի գլխավոր տնօրեն Ադալաթ Հասանովը մամուլի ասուլիսում հայտնել էր, որ սպանության գործով մեղադրյալներ Հուսեյն և Զիյադդին Սաֆարով եղբայրների մահվան պատճառը ստացած վնասվածքների հետևանքով առաջացած հետտրավմատիկ շոկն էր։

ՌԴ-ում վերջիններիս մահվան պատճառը կապել էին սրտի հետ ունեցած խնդիրների հետ։ Ադրբեջանը սեփական դատաբժշկական փորձաքննությունն էր իրականացրել՝ հայտարարելով, որ ձերբակալվածները խոշտանգումների են ենթարկվել։