Դատարանը մերժել է Էքրեմ Իմամօղլուի փաստաբանների բողոքը

Դատարանը մերժել է Ստամբուլի նախկին քաղաքապետ Էքրեմ Իմամօղլուի փաստաբանների բողոքը, որոնք պահանջում էին նրան ազատել կալանքից։ Այս մասին հայտնել է AHaber հեռուստաալիքը։
Ստամբուլի պաշտոնանկ արված քաղաքապետ Էքրեմ Իմամօղլուի փաստաբանները ապրիլի 7-ին բողոք են ներկայացրել նրա ձերբակալության դեմ՝ հայտարարելով, որ տեղի է ունեցել անօրինական հետաքննություն և պահանջելով ազատ արձակել իրենց պաշտպանյալին։

«Դատարանը գնահատել է փաստաբանների բողոքը, որոնք պահանջում էին ազատ արձակել Իմամօղլուին և İBB Medya-ի տնօրեն Մուրադ Օնգունին և մերժել այն»,- հայտնում է հեռուստաալիքը։

Ավելի վաղ Թուրքիայի ընդդիմադիր Ժողովրդահանրապետական ​​կուսակցությունը հայտարարել էր, որ ավելի քան 10 միլիոն ստորագրություն է հավաքել իր կողմնակիցներից՝ արտահերթ նախագահական ընտրությունների և ձերբակալված Էքրեմ Իմամօղլուի ազատ արձակման պահանջով։

Հիշեցնենք, որ Իմամօղլուն մարտի 19-ին բերման էր ենթարկվել կոռուպցիայի կասկածանքով և ոստիկանության ուղեկցությամբ դատարան ներկայացվել։ Էքրեմ Իմամօղլուի ձերբակալությունը զանգվածային բողոքի ցույցերի առիթ է դարձել Թուրքիայում։ Իմամօղլուն Ստամբուլի քաղաքապետարանը ղեկավարում է 2019 թվականից և այդ պաշտոնում վերընտրվել է 2024 թվականին։