«Մասկը վերացրել է Ուկրաինայում Starlink համակարգի աշխատանքի սահմանափակումները»․ Թրամփ

ԱՄՆ նախագահ Դոնալդ Թրամփը հայտարարել է, որ SpaceX ընկերության ղեկավար Իլոն Մասկը վերացրել է ուկրաինացի զինվորականների համար Starlink համակարգի աշխատանքի արագության սահմանափակումը, սակայն չի մեկնաբանել՝ արդյոք գործարարը դա արել է իր զանգից հետո։

«Ես չեմ ցանկանում մեկնաբանել դա։ Գիտեք՝ կարևոր չէ՝ ես եմ զանգահարել, թե մեկ ուրիշը։ Կարծում եմ՝ գլխավորն այն է, որ նա ամեն ինչ վերականգնել է»,- լրագրողներին ասել է Թրամփը։ ԱՄՆ նախագահի խոսքով՝ ինքը շատ լավ հարաբերություններ ունի Մասկի հետ։

Ավելի վաղ՝ The Wall Street Journal-ը, հղում կատարելով իր աղբյուրներին, հայտնել էր, որ Թրամփը դիմել է Մասկին՝ կոչ անելով վերացնել Ուկրաինայի համար Starlink համակարգի օգտագործման սահմանափակումները։ Թերթի տվյալներով՝ ԱՄՆ նախագահը զանգահարել է Մասկին, որը, պարբերականի աղբյուրների պնդմամբ, ավելի վաղ հրահանգել էր դանդաղեցնել համակարգի աշխատանքն Ուկրաինայում։ WSJ-ի աղբյուրները հստակեցրել են, որ Թրամփի և Մասկի զրույցից կարճ ժամանակ անց Starlink-ի աշխատանքը բարելավվել է։ Միևնույն ժամանակ, որոշ աղբյուրներ նշել են, որ համակարգի լիարժեք գործառույթները դեռ ամբողջությամբ չեն վերականգնվել։