«Starlink-ի աշխատանքն Ուկրաինայի զինված ուժերի համար դանդաղեցնելու հրահանգը տվել է Իլոն Մասկը»․ #WSJ

SpaceX-ի գործադիր տնօրեն Իլոն Մասկն է հրահանգել նվազեցնել Starlink-ի ռազմական տարբերակի աշխատանքի արագությունը, որը խուճապ է առաջացրել Կիևում և շփոթություն՝ Դոնալդ Թրամփի վարչակազմում։ Այս մասին գրում է The Wall Street Journal-ը՝ հղում կատարելով աղբյուրներին։

Պարբերականը նշում է, որ վերջին շաբաթներին Մասկը և Թրամփը դժգոհություն են հայտնել Ուկրաինայի կողմից ռուսական նավթավերամշակման գործարաններին հասցված հարվածների կապակցությամբ։ ԱՄՆ նախագահն այն համարել է էներգակիրների բարձր գների պատճառներից մեկը։

Աղբյուրների հաղորդմամբ՝ անցյալ շաբաթ Մասկը սահմանափակել է այն արագությունը, որով ուկրաինական սարքավորումները կարող էին միանալ արբանյակային ցանցին։ Դրա հետևանքով անօդաչու թռչող սարքերի մի մասը գործնականում այլևս հնարավոր չի եղել օգտագործել։

Ամերիկացի որոշ պաշտոնյաների պնդմամբ՝ Մասկը գործել է միանձնյա, և Թրամփը կոնկրետ հրահանգ չի տվել Ուկրաինայի դեմ որևէ պատասխան միջոց ձեռնարկելու վերաբերյալ։ Սակայն իրավիճակին ծանոթ աղբյուրը հայտնել է, որ Մասկը, նախքան արագության սահմանափակում մտցնելը, զրուցել է վարչակազմի մի քանի ներկայացուցիչների, մասնավորապես՝ Թրամփի հետ։

Ուկրաինացի պաշտոնյաների խոսքով՝ այդ սահմանափակումը հնարավորություն է տվել ռուսական հրթիռներին շրջանցել Ուկրաինայի հակաօդային պաշտպանության համակարգերը։