«Կարծում էին՝ Հայաստանն այլևս զվարթ փառատոնների երկիր է, կուլ կտան». Նարինե Դիլբարյան

ԵՊՀ Հայոց լեզվի պատմության ամբիոնի դոցենտ Նարինե Դիլբարյանը ֆեյսբուքյան իր էջում գրել է․ «Անպարագիծ ամոթ և նողկանք էր երեկվա Հ1-ի «համերգային» հեռարձակումը, այսօր հայտարարում են՝ «Սեպտեմբերի 27-ին հեռարձակված համերգը սխալ էր, և մենք ընդունում ենք դրա պատասխանատվությունը․ Հ1»։ Թաթայի «ներողություն» գրահյուսի ձևակերպումը շահեկան էր՝ «սխալ»։ Օգտվեցին։ Բայց արդյոք դա «սխալ» է լոկ, հավաքակա՞ն սխալ, մեկը չկար ղեկավար և մնացյալ կազմում՝ ամոթանք տար, հիշեր մեր զոհերին, մարդ լինելու նուրբ ու կարևոր արվեստը, փաստորեն չկար։ Եվ ընդհանրապես պարզ չէ՝ ինչ «պատասխանատվություն են ընդունում»։ Հայերենում պատասխանատվությունը կրում են, ստանձնում, սխալն են ընդունում։ Չգիտեմ՝ ում հոգին թեթևացավ, իրականում ցավն ու ամոթը, վիրավորանքը խեղդում են։
Կարծում էին՝ Հայաստանն այլևս զվարթ փառատոնների երկիր է, կուլ կտան։ Իսկ Ադրբեջանի հեռուստատեսության ալիքներով՝ իրենց «հերոս զոհերի» խոնարհում-փառաբանում էր։ Հարձակված «զոհերի»։ Այսպես էլ ապրում ենք…»։