«Քննարկել ենք Ուկրաինային աջակցելու փաթեթը». Զելենսկի

Ուկրաինայի նախագահ Վլադիմիր Զելենսկին հայտնել է, որ ԱՄՆ այցի ընթացքում հանդիպել է Ֆրանսիայի նախագահ Էմանուել Մակրոնի հետ։ Այս մասին նա գրել է թելեգրամյան ալիքում։

«Խոսել ենք նախևառաջ անվտանգության հարցերի և Ուկրաինայի համար ձմեռային աջակցության փաթեթի մասին։ Շարունակում ենք աշխատել Ուկրաինայում SAMP/T հակաօդային պաշտպանության համակարգերի և դրանց համար նախատեսված հրթիռների արտադրության հնարավորության, ինչպես նաև գործընկերների հետ համատեղ հակաբալիստիկ FREYJA ծրագրի ուղղությամբ»,- նշել է Զելենսկին։

Նա հայտարարել է, որ նախևառաջ նախատեսվում է այդ համակարգերի և դրանց զինամթերքի գնումներն իրականացնել Եվրոպական միության (ԵՄ) վարկի շրջանակում տրամադրվող ֆինանսական միջոցների հաշվին։ Ուկրաինայի նախագահը հույս է հայտնել, որ արտադրության առաջին արդյունքները հնարավոր կլինի ստանալ արդեն այս տարի։