Մեքսիկայում ձերբակալել են ամենաորոնվող թմրաբարոնին, որի համար ԱՄՆ-ն 5 միլիոն դոլար էր խոստանում

Մեքսիկայի իշխանությունները ձերբակալել են «Լոս Ռեյես» թմրակարտելի առաջնորդ Ալֆոնսո Ֆերնանդես Մագալյոնին, որը հայտնի է որպես Պոնչո։

Մագալոնը Միացյալ Նահանգներում ամենաշատ որոնվող հանցագործներից մեկն է, և ամերիկյան իշխանությունները մինչև 5 միլիոն դոլար պարգևատրում են առաջարկել նրա ձերբակալմանը նպաստող տեղեկատվության համար։ Ձերբակալությունն իրականացվել է մեքսիկացի զինվորականների կողմից՝ Միչոական նահանգի արևմտյան մասում գտնվող Ազգային գվարդիայի աջակցությամբ, որտեղ գտնվում է «Լոս Ռեյես» կարտելը։ Մագալյոնը խիստ հսկողության ներքո տեղափոխվել է Մեխիկո և հանձնվել Մեքսիկայի գլխավոր դատախազի գրասենյակին։

Իրենց առաջնորդի ձերբակալությանն ի պատասխան՝ «Լոս Ռեյես»-ի անդամները փակել են Միչոականի մի քանի ճանապարհներ՝ բարիկադներ տեղադրելով և տասնյակ մեքենաներ հրկիզելով։ Ռազմական ներկայությունը տարածաշրջանում ուժեղացվել է մինչև օրենքի և կարգուկանոնի լիակատար վերականգնումը։

Ըստ տեղեկությունների՝ կարտելը զբաղվում է թմրանյութերի մաքսանենգությամբ դեպի Միացյալ Նահանգներ, մասնավորապես այն պատճառով, որ Մագալյոնը վերահսկում էր Կոլումբիայից Միչոական կոկաին տեղափոխող ինքնաթիռների կողմից օգտագործվող թռիչքուղիները։ Խումբը նաև ներգրավված է առևանգումների, մեքենաների գողության, շորթման և այլ հանցագործությունների մեջ: Խմբի անդամները նաև բազմիցս հարձակվել են մեքսիկացի զինվորականների վրա՝ օգտագործելով պայթուցիկներով զինված անօդաչու թռչող սարքեր: ԱՄՆ-ի իշխանությունները Մագալյոնին մեղադրում են թմրանյութերի արտադրության և Միացյալ Նահանգներ ապօրինի տեղափոխման կազմակերպման մեջ: Մեքսիկայում ԱՄՆ-ի դեսպան Ռոնալդ Ջոնսոնը հայտարարել է, որ Մագալյոնի ձերբակալությունը «մեկ այլ հստակ ազդանշան է. այս հանցագործները չեն փախչի»: