«Շվեյցարիայում այսօր նախատեսված ԱՄՆ-Իրան բանակցությունները չեն կայանա»․ #Reuters

Բյուրգենշտոկում այսօր նախատեսված ԱՄՆ-Իրան բանակցությունները չեն կայանա, հաղորդում է Reuters-ը՝ հղում կատարելով Շվեյցարիայի արտաքին գործերի նախարարությանը։

Լրատվամիջոցը չի նշում հանդիպման չեղարկման պատճառները, ինչպես նաև չի տրամադրում նոր ամսաթվի մասին տեղեկատվություն։

Ավելի վաղ Սպիտակ տունը հայտնել էր, որ ԱՄՆ փոխնախագահ Ջեյ Դի Վենսը չի ծրագրում հինգշաբթի երեկոյան մեկնել Շվեյցարիա՝ ԱՄՆ-ի և Իրանի միջև փոխըմբռնման հուշագրի ստորագրման արարողությանը մասնակցելու համար: Axios-ի թղթակից Բարաք Ռավիդի հաղորդմամբ՝ Վաշինգթոնի կողմից փոխնախագահ Վենսի Շվեյցարիա այցը հետաձգելու պատճառը կարող էր լինել Թեհրանի դիրքորոշումը Լիբանանի հարցում։ Վենսն ավելի վաղ հայտարարել էր, որ հիշյալ արարողությունը տեղի կունենա, ամենայն հավանականությամբ, հանգստյան օրերին:

Հիշեցնենք, որ Իրանի նախագահ Մասուդ Փեզեշքիանը և ԱՄՆ նախագահ Դոնալդ Թրամփն արդեն էլեկտրոնային եղանակով ստորագրել են երկու երկրների միջև փոխըմբռնման հուշագիրը։ Իսկ Շվեյցարիայում նախատեսված էր հուշագրի ստորագրման հանդիսավոր արարողությունը և բանակցություններ։