«ԱՄՆ-ն Մերձավոր Արևելք է տեղափոխել լրացուցիչ F-35A կործանիչներ»․ #Itamilradar

ԱՄՆ-ն Մերձավոր Արևելք է տեղափոխել հինգերորդ սերնդի լրացուցիչ տասնութ F-35A Lightning II «ստելս» կործանիչներ՝ ավիացիոն խմբավորումն ուժեղացնելու համար, հայտնում է Itamilradar-ը:

Ամերիկյան կործանիչները թռել են Մեծ Բրիտանիայի Լեյքենհիթ ավիաբազայից։ Նրանց թռիչքը դեպի Մերձավոր Արևելք ապահովել են KC-135 Stratotanker լիցքավորող ինքնաթիռները։

Ինչպես նշում է հարթակը, դա ամերիկյան մարտական ավիացիայի միաժամանակյա խոշորագույն փոխադրումներից մեկն է տարածաշրջան: Դրա մասշտաբները ցույց են տալիս ԱՄՆ-ի ռազմական ներուժի կտրուկ աճը Մերձավոր Արևելքում՝ Իրանի հետ լարվածության աճի ֆոնին։

Նոր ինքնաթիռների ժամանմամբ՝ ԱՄՆ-ն այժմ Մերձավոր Արևելքում արդեն ունի երեսուն F-35A կործանիչ, F-15E Strike Eagle կործանիչների երկու էսկադրիլիա (24 ինքնաթիռ) և A-10 Thunderbolt II գրոհային ինքնաթիռների մեկ էսկադրիլիա (12 ինքնաթիռ): Տարածաշրջանի բազաներում ամերիկյան մարտական ​​ինքնաթիռների ընդհանուր թվաքանակը հասնում է մոտավորապես 66 միավորի։

Բացի այդ, USS Abraham Lincoln ավիակրի վրա, որը գտնվում է Արաբական ծովում՝ Իրանի մերձակայքում, տեղակայված են F-35C Lightning II կործանիչների մեկ էսկադրիլիա և F/A-18E/F Super Hornet կործանիչների երեք էսկադրիլիա։ Դրանցից յուրաքանչյուրը բաղկացած է մոտ 12 ինքնաթիռից։