ԵՄ-ն ՌԴ-ն ներառել է փողերի լվացման բարձր ռիսկ ունեցող երկրների ցանկում

Եվրոմիությունը պաշտոնապես Ռուսաստանը դասել է փողերի լվացման և ահաբեկչության ֆինանսավորման բարձր ռիսկ ունեցող երկրների շարքին։ Այս մասին հայտարարությունը հրապարակվել է ԵՄ պաշտոնական տեղեկագրում։

Եվրոհանձնաժողովը որոշումն ընդունել է 2025 թվականի դեկտեմբերի 3-ին։ Այն ուժի մեջ է մտել հրապարակումից 20 օր անց՝ հունվարի 9-ին, քանի որ դրա դեմ առարկություններ չեն եղել Եվրոխորհրդարանի կամ Խորհրդի կողմից։ Ցանկը, ըստ էության, ծառայում է՝ որպես սև ցուցակ այն երկրների, որոնք, ԵՄ կարծիքով, թույլ են համապատասխանում փողերի լվացման դեմ պայքարի միջազգային չափանիշներին։
Ռուսաստանի սև ցուցակում ընդգրկվելը կպարտավորեցնի ԵՄ ֆինանսական հաստատություններին ուժեղացնել բոլոր գործարքների նկատմամբ վերահսկողությունը և կստիպի այն բանկերին, որոնք դեռևս չեն իրականացրել ռիսկերի մեղմացման միջոցառումներ Ռուսաստանի դեմ, ընդունել դրանք։ Սա կազդի ռուսական ընկերությունների կամ քաղաքացիների հետ կապված բոլոր փոխանցումների և հաշիվների վրա։

«Ռոսֆինմոնիտորինգ»-ը Եվրոհանձնաժողովի որոշումը քաղաքականացված է անվանել։ Գործակալությունը կարծում է, որ դրա համար իրական հիմքեր չկան։ «Եվրոհանձնաժողովի փաստաթուղթը վերաբերում է միայն Եվրոմիության (ԵՄ) իրավասության ներքո գտնվող կազմակերպություններին։ Ռուսաստանի փողերի լվացման դեմ պայքարի համակարգը, ներառյալ վարկային և ֆինանսական ոլորտը, կշարունակի գործել նախկինի պես», - հավելել են նրանք։