Արաղչին կոչ է արել իր գործընկերներին դատապարտել Թրամփի սպառնալիքները Թեհրանի դեմ

Իրանի արտաքին գործերի նախարար Աբբաս Արաղչին նամակ է հղել իր գործընկերներին՝ կոչ անելով դատապարտել ԱՄՆ նախագահ Դոնալդ Թրամփի սպառնալիքները Իսլամական Հանրապետության դեմ, հաղորդում է Իրանի արտաքին գործերի նախարարությունը։

«Նամակում արտաքին գործերի նախարար Աբբաս Արաղչին ԱՄՆ նախագահի վերջին սպառնալիքները Իրանի Իսլամական Հանրապետության դեմ անվանել է միջազգային իրավունքի և ՄԱԿ-ի կանոնադրության կոպիտ խախտում և կոչ է արել բոլորին խստորեն դատապարտել այդ սադրիչ հայտարարությունները», - ասվում է Իրանի արտաքին գործերի նախարարության թելեգրամյան ալիքում տեղադրված հայտարարության մեջ։

Նշվում է, որ Արաղչին նաև առանձին նամակներ է հղել ՄԱԿ-ի գլխավոր քարտուղարին, ՄԱԿ-ի Անվտանգության խորհրդի նախագահին և ատոմային էներգիայի միջազգային գործակալության գլխավոր տնօրենին։

Ավելի վաղ Թրամփը հայտարարել էր Իրանին հարվածներ հասցնելու պատրաստակամության մասին, եթե Թեհրանը փորձի վերսկսել իր միջուկային ծրագրի շուրջ աշխատանքները: