ԱՄՆ-ն հաջորդ տարի կհյուրընկալի G20-ը և կհրավիրի Ղազախստանի և Ուզբեկստանի առաջնորդներին

ԱՄՆ-ի նախագահ Դոնալդ Թրամփը հայտարարել է, որ Ղազախստանը և Ուզբեկստանը կհրավիրվեն մասնակցելու 2026 թվականի Քսանյակի խմբի (G20) գագաթնաժողովին Մայամիում՝ որպես հյուր երկրներ: Նա հայտարարությունը հրապարակել է Truth Social սոցիալական մեդիա հարթակում։

«Այսօր առավոտյան ես երկու հիանալի զրույց ունեցա Ղազախստանի նախագահ Կասիմ-Ժոմարտ Տոկաևի և Ուզբեկստանի Հանրապետության նախագահ Շավքաթ Միրզիյոևի հետ: Մենք քննարկեցինք շարունակվող հակամարտություններում խաղաղության հասնելու կարևորությունը, ինչպես նաև մեր երկրների միջև առևտրի և համագործակցության աճը: Մեր երկրների միջև հարաբերությունները գերազանց են»,- հայտարարել է Թրամփը։

Ամերիկացի առաջնորդը նշել է, որ Միացյալ Նահանգները հաջորդ տարի կհյուրընկալի G20 գագաթնաժողովը և կհրավիրի Ղազախստանի և Ուզբեկստանի առաջնորդներին՝ մասնակցելու Մայամիում կայանալիք «այս կարևոր իրադարձությանը»՝ որպես հյուր: