Ռուս լեռնագնացուհի Նատալյա Նագովիցինան պաշտոնապես ճանաչվել է մահացած

Ղրղզստանի լեռնագնացության և ժայռամագլցման ֆեդերացիայի նախագահ Էդուարդ Կուբատովը հայտնել է, որ սեպտեմբերի 2-ին անօդաչու թռչող սարքից երկու անգամ զննվել է լեռնագնաց Նատալյա Նագովիցինայի գտնվելու վայրը։ Ռուս կնոջ մոտ կյանքի նշաններ չեն հայտնաբերվել։

Փրկարարական գործողությունը պաշտոնապես ավարտվել է։

Կուբատովը նշել է, որ Պոբեդա գագաթի ողջ պատմության ընթացքում 7200 մետր բարձրության վրա ոչ մի փրկարարական գործողություն հաջողությամբ չի պսակվել:

Հիշեցնենք, որ 47-ամյա Նագովիցինան օգոստոսի 12-ին Պոբեդա գագաթից իջնելիս կոտրել է ոտքը։ Նա մնացել է 7200 մետր բարձրության վրա՝ իր հետ ունենալով միայն ջրի փոքր պաշար։

Երեք անգամ փորձ է արվել փրկել Նագովիցինային, բայց երեք փորձերն էլ անհաջող են եղել։ Այդ փորձերից մեկից հետո մահացել է իտալացի լեռնագնաց Լուկա Սինիգիլիան։ Մեկ այլ փորձի ժամանակ փրկարարական ուղղաթիռը կոշտ վայրէջք է կատարել, անձնակազմը վիրավորվել է:

Պոբեդա գագաթի բարձրությունը ծովի մակարդակից 7439 մետր է։ Այս լեռը համարվում է Կենտրոնական Ասիայի ամենադժվարամատչելի լեռներից մեկը։