Պակիստանը հայտարարել է հրթիռային զորքեր ստեղծելու մասին

Պակիստանը պատրաստվում է իր զինված ուժերը համալրել հրթիռային զորքերով, հայտարարել է վարչապետ Շահբազ Շարիֆը, հաղորդում է Reuters-ը։

Վարչապետն այս մասին հայտարարել է օգոստոսի 14-ին՝ Պակիստանի անկախության օրվան ընդառաջ Իսլամաբադում կայացած արարողության ժամանակ։

«Հրթիռային ուժերը հագեցած կլինեն ժամանակակից տեխնոլոգիաներով», - ասել է Շարիֆը։

Պակիստանցի բարձրաստիճան զինվորականներից մեկի խոսքով՝ ուժերը կունենան իրենց սեփական հրամանատարությունը։

«Ակնհայտ է, որ հրթիռները նախատեսված են Հնդկաստանի համար», - ասել է նա։

Հնդկաստանի վարչապետ Նարենդրա Մոդին օգոստոսի 2-ին հայտարարել էր, որ Պակիստանի կողմից ցանկացած ապագա հարձակում «կարժանանա վճռական պատասխանի»՝ հնդկական սպառազինության կիրառմամբ։

2025 թվականի ապրիլին Հնդկաստանի և Պակիստանի միջև լարվածությունը կտրուկ սրվեց, երբ Քաշմիրում Դիմադրության ճակատի զինյալները հարձակվել էին զբոսաշրջիկների վրա՝ սպանելով 26 մարդու։