Թրամփը հայտարարել է ԵՄ-ի հետ առևտրային համաձայնագրի կնքման մասին

Միացյալ Նահանգներն առևտրային համաձայնագիր է կնքել Եվրոմիության հետ, հայտարարել է ԱՄՆ նախագահ Դոնալդ Թրամփը՝ Շոտլանդիայում Եվրոհանձնաժողովի նախագահ Ուրսուլա ֆոն դեր Լայենի հետ զրույցից հետո, հաղորդում է Bloomberg-ը։

Նրա խոսքով՝ ԵՄ-ն համաձայնել է գնել 750 միլիարդ դոլարի ամերիկյան էներգակիրներ և ներդնել ևս 600 միլիարդ դոլար ԱՄՆ տնտեսության մեջ։ Բրյուսելը նաև կգնի «մեծ քանակությամբ» ռազմական տեխնիկա, ասել է Թրամփը։

Այս համաձայնագիրը ԵՄ-ին թույլ կտա խուսափել 30% մաքսատուրքերից, որոնք Թրամփը սպառնացել էր սահմանել օգոստոսի 1-ին։

«Համաձայնագրի շրջանակներում ԱՄՆ-ն 15% մաքսատուրք կսահմանի ԵՄ-ից ներմուծման մեծ մասի, այդ թվում՝ ավտոմեքենաների վրա։ Ամերիկյան արտահանման համար Բրյուսելն իր շուկաները կբացի զրոյական դրույքաչափով»,- ասել է Թրամփը։