«Բանակցությունների հաջորդ փուլին կքննարկվեն խաղաղ կարգավորման վերաբերյալ հուշագրերի նախագծերը»․ Պեսկով

Ռուս-ուկրաինական ուղիղ բանակցությունների երրորդ փուլի գլխավոր թեման կլինեն խաղաղ կարգավորման վերաբերյալ հուշագրերի նախագծերը, որոնք փոխանակել էին Մոսկվան և Կիևը։ Այս մասին ճեպազրույցի ժամանակ հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Բանակցությունների թեման բավականին բարդ է. ի թիվս այլ հարցերի, իհարկե, անհրաժեշտ կլինի քննարկել հենց այն հուշագրերի նախագծերը, որոնք փոխանակվել էին կողմերի միջև բանակցությունների երկրորդ փուլի ընթացքում»,- հայտարարել է Կրեմլի ներկայացուցիչը։

Ավելի վաղ հաղորդվել էր, որ Մոսկվայի և Կիևի միջև բանակցությունների հաջորդ փուլը կարող է կայանալ Ստամբուլում՝ հուլիսի 24-25-ը։

Հիշեցնենք՝ Ռուսաստանի և Ուկրաինայի միջև բանակցությունների երկրորդ փուլը տեղի էր ունեցել Ստամբուլում՝ հունիսի 2-ին։ Կողմերը փոխանակել էին խաղաղ կարգավորման վերաբերյալ հուշագրերի նախագծեր, ինչպես նաև համաձայնել ծանր վիրավորված ռազմագերիներին և զոհվածների մարմինների փոխանակմանը։