«Հարուցվել է քրեական գործ»․ Քննչական կոմիտեն՝ Գ․ Հեբոյանի, Ք․ Պողոսյանի, Ա․ Անանյանի, Է․ Պետրոսյանի, Հ․ Ավդալյանի, Գ․ Հապետյանի մասնակցությամբ մահվան ելքով դեպքի մասին

Ի պատասխան ՄԱՄՈՒԼ․am-ի հարցման, ՀՀ քննչական կոմիտեից տեղեկացնում են․ «(...) հայտնում ենք, որ ՀՀ քննչական կոմիտեի Երևան քաղաքի վարչության Կենտրոն և Նորք-Մարաշ վարչական շրջանների քննչական երկրորդ բաժնում 2025 թվականի մայիսի 20-ին քաղաքացու մահվան դեպքի առթիվ ՀՀ քրեական օրենսգրքի 187-րդ հոդվածի 2-րդ մասի հատկանիշներով նախաձեռնվել է քրեական վարույթ և կատարվում է նախաքննություն»։

Հիշեցնենք, որ մայիսի 12-ին հաղորդում է ներկայացվել Նորք Մարաշ ԲԿ-ի բժիշկներ՝ Գագիկ Հեբոյանի (սրտային վիրաբույժ), Քրիստինե Պողոսյանի (սրտաբան), Հովհաննես Ավդալյանի (կրտսեր սրտային վիրաբույժ), Գագիկ Հապետյանի (կրտսեր սրտային վիրաբույժ), Էդուարդ Պետրոսյանի (վերակենդանացման և ինտենսիվ թերապիայի ծառայության ղեկավար), Արա Անանյանի (վիրաբուժական պացիենտների պատասխանատու բժիշկ) դեմ։
Համաձայն հաղորդման՝ սրտի բաց վիրահատությունից հետո լիարժեք ապաքինված քաղաքացին մահացել է բուժանձնակազմի՝ կյանքի համար վտանգավոր գործողությունների, իսկ ծայրահեղ ծանր վիճակում՝ անգործության հետևանքով։

Խմբագրությունն անդրադարձել է այս միջադեպին՝

1) «Մահվան ելքով վիրահատությունից հետո հաղորդում է ներկայացվել բժիշկներ՝ Գագիկ Հեբոյանի, Քրիստինե Պողոսյանի, Հովհաննես Ավդալյանի, Գագիկ Հապետյանի, Էդուարդ Պետրոսյանի, Արա Անանյանի դեմ»,

2) «Նորք Մարաշ ԲԿ-ն քաղաքացու մահվանից 26 օր անց է միայն «ցավակցություն» հայտնում»,

3) «Նույն անձնակազմը ինձնից խլեց մայրիկիս»․ հանրությունը՝ ողբերգական միջադեպին մասնակից բժիշկների մասին հոդվածներով։

Խմբագրությունը հարցումներ է հղել նաև ՀՀ Առողջապահության նախարարությանն ու Դատախազություն, և պատասխաններն ստանալուն պես կանդրադառնանք նաև դրանց։

Հիշեցնենք նաև, որ վերոնշյալ հրապարակումներից հետո, քաղաքացիներն ահազանգել և խմբագրություն են ուղարկել մի շարք տեսա և ձայնագրություններ՝ վերոնշյալ բժիշկների գործողությունների և բուժհաստատությունում տեղի ունեցած միջադեպերի արձանագրումներով, որոնց կանդրադառնանք առաջիկա օրերին։