«ԵԱՏՄ-ից դուրս գալու գործընթացը ցավոտ է լինելու ՀՀ բնակչության համար»․ Գալուզին

ԵԱՏՄ-ից դուրս գալու գործընթացը ցավոտ է լինելու Հայաստանի բնակչության համար, «Իզվեստիա»-ին տված հարցազրույցում ասել է ՌԴ ԱԳ փոխնախարար Միխայիլ Գալուզինը։

«Եթե Հայաստանը գնա եվրոինտեգրման ճանապարհով, դա օբյեկտիվորեն կհանգեցնի ԵԱՏՄ գործընկերների հետ հաստատված տնտեսական հարաբերությունների վերանայմանը: Սա, հավանաբար, բավականին ցավոտ գործընթաց կլինի, այդ թվում, Հայաստանի բնակչության համար»,- ասել է ԱԳ փոխնախարարը։

«Մենք Հայաստանի շահերը ոտնահարելու մտադրություն չունենք ու չենք էլ կարող ունենալ, ՀՀ-ն մեր դաշնակիցն է, ռազմավարական գործընկերը, որի հետ մեզ բազմադարյա ընդհանուր պատմությունն է կապում։

Փաստն այն է, որ օբյեկտիվորեն միաժամանակ անհնար է անդամակցել ԵՄ-ին և ԵԱՏՄ-ին, քանի որ այդ միություններն ունեն մաքսային և սակագնային տարբեր կարգավորումներ. դրանք ըստ էության տնտեսական տարբեր բլոկներ են։ Ըստ այդմ, մեր հայ գործընկերները, հավանաբար, ինչ-որ պահի պետք է որոշեն, թե որ ուղղությամբ են գնում՝ ԵՄ ինտեգրո՞ւմ, թե՞ ԵԱՏՄ միջոցով եվրասիական ինտեգրման շարունակական մասնակցություն»,- պարզաբանել է Գալուզինը։