Չինաստանը պատասխան մաքսատուրքեր կսահմանի ամերիկյան բոլոր ապրանքների վրա

Չինաստանը հայտարարել է, որ մինչև 34% լրացուցիչ մաքսատուրք կսահմանի ԱՄՆ-ից ներմուծվող ապրանքների վրա՝ ի պատասխան Դոնալդ Թրամփի հայտարարած մաքսատուրքերի, ասվում է Չինաստանի պետխորհրդի սակագների հանձնաժողովի տարածած հաղորդագրության մեջ։

Այս միջոցներն ուժի մեջ կմտնեն ապրիլի 10-ից։

«Չինաստանը Միացյալ Նահանգներին կոչ է անում անհապաղ վերացնել միակողմանի մաքսային միջոցները և առևտրի ոլորտում տարաձայնությունները լուծել խորհրդակցությունների միջոցով՝ հավասար, հարգալից և փոխշահավետ հիմունքներով»,- ասվում է փաստաթղթում:

Ապրիլի 2-ին Դոնալդ Թրամփը հայտարարել էր, որ մաքսատուրքեր է սահմանելու այլ երկրների ապրանքների վրա։ Ցանկում ընդգրկվել էր նաև Չինաստանը։ Չինական ապրանքների վրա Թրամփը 34 տոկոս մաքսատուրք էր սահմանել։