«Ինչի՞ց եք ենթադրում, որ այս նախագծով գույքահարկն ավելանալու է». Նարեկ Ղահրամանյան

ՔՊ-ական պատգամավոր Նարեկ Ղահրամանյանը, անդրադառնալով Հարկային օրենսգրքում լրացումներ կատարելու մասին օրենքի նախագծի վերաբերյալ ընդդիմադիրների ելույթներին, ասաց. «Հասկանում եմ, որ կիսատ-պռատ եք կարդում նախագիծը, բայց սա չի նշանակում, որ պետք է էստեղից ապատեղեկատվություն տարածեք: Եթե այս նախագիծը չընդունենք, տույժերն ու տուգանքները ևս հաշվարկվելու են: Երկրորդ, ինձ հանդիպած դեպքերի կեսից ավելին հակառակ հաշվարկ է կատարվելու, իրենց ավել վճարածը հաշվարկվելու է հաջորդ տարիներին եկած գույքահարկի վրա: Ինչի՞ց եք ենթադրում, որ պարտադիր պետք է գույքահարկն ավելանա: Իմ հանդիպած դեպքերի մեծ մասում պակասելու է»:

Հիշեցնենք՝ Կադաստրի կոմիտեի ղեկավար Սուրեն Թովմասյանն իր ելույթում ասել էր, որ 2012-ից սկսած կոմիտեում տեղեկատվական բազայի թվայնացման հետևանքով բազա են մուտքագրվել գույքերի վերաբերյալ բազմաթիվ տեղեկատվություններ, որի հիման վրա սկսվել է հաշվարկվել գույքահարկը: «Սկսած 2021-ից սկսեցինք բացահայտել բազմաթիվ թերություններ տվյալների բազայում, որոնց հիման վրա քաղաքացիներին առաջադրվել էր պակաս գույքահարկ, որոշ դեպքերում՝ ավել: Նախագծով փորձում ենք ֆիքսել, որ եթե գույքահարկը հաշվարկված է սխալ, ու այն եղել է տեղեկատվական բազայի սխալի հետևանքով, զրոյացնում ենք այն տույժերը, որոնք պետք է հաշվարկվեին քաղաքացիների վրա ու զրոյացման խնդիրը տարածում ենք 2021-ից սկսած՝ գույքահարկի բազաների վրա»,- ասել էր Թովմասյանը: