«Սիրուն բառակույտի փոխարեն ասեք՝ ժողովո՛ւրդ, ձեր գույքահարկերը ևս մեկ անգամ թանկանալու են». Արման Ղազարյան

Խորհրդարանը քննարկում է Կառավարության ներկայացրած Հարկային օրենսգրքում լրացումներ կատարելու մասին օրենքի նախագիծը երկրորդ ընթերցմամբ և ամբողջությամբ ընդունելու մասին հարցը: Հիմնական զեկուցող Կադաստրի կոմիտեի ղեկավար Սուրեն Թովմասյանն իր ելույթում ասաց, որ 2012-ից սկսած կոմիտեում տեղեկատվական բազայի թվայնացման հետևանքով բազա են մուտքագրվել գույքերի վերաբերյալ բազմաթիվ տեղեկատվություններ, որի հիման վրա սկսվել է հաշվարկվել գույքահարկը: «Սկսած 2021-ից սկսեցինք բացահայտել բազմաթիվ թերություններ տվյալների բազայում, որոնց հիման վրա քաղաքացիներին առաջադրվել էր պակաս գույքահարկ, որոշ դեպքերում՝ ավել: Նախագծով փորձում ենք ֆիքսել, որ եթե գույքահարկը հաշվարկված է սխալ, ու այն եղել է տեղեկատվական բազայի սխալի հետևանքով, զրոյացնում ենք այն տույժերը, որոնք պետք է հաշվարկվեին քաղաքացիների վրա ու զրոյացման խնդիրը տարածում ենք 2021-ից սկսած՝ գույքահարկի բազաների վրա»,- ասաց նա: Ընդդիմադիր խմբակցության պատգամավոր Արման Ղազարյանն իր ելույթում հակադարձեց. «Մեծ առոգանությամբ խոսվում է, որ սա լավարկող նորմ է. բացարձակ էդպես չէ: Նախորդ անգամ այդպես էլ չկարողացաք հիմնավորել՝ դրանց ո՞ր մասն է եղել քաղաքացիների մեղքով, ո՞րը՝ պատկան մարմինների: Եթե պետությունը սխալ է հաշվարկել, պետության պարտականությունն է, պարտավոր է տույժ-տուգանքը հանել: Պարզ ասեք՝ ժողովո՛ւրդ ջան, ձեր գույքահարկերը ևս մեկ անգամ թանկանալու են՝ ինչպես հիմա, մինչև 2026-ի ավարտը»: