Դեմոկրատները բոյկոտելու են Նեթանյահուի ելույթը Քոնգրեսում

ԱՄՆ Ներկայացուցիչների պալատի և Սենատի 86 դեմոկրատ ներկայացուցիչներ հայտարարել են, որ մտադիր են բոյկոտել Իսրայելի վարչապետ Բենիամին Նեթանյահուի ելույթը Քոնգրեսում։ Այս մասին հայտնում է CNN-ը։
Բացի այդ, Պաղեստինամետ և հրեական կազմակերպությունների անդամները հավաքվում են Քափիթոլիումի դիմաց՝ բողոքելու Իսրայելի առաջնորդին Քոնգրես ընդունելու դեմ։ Քափիթոլիումի տարածքում փակվել են ճանապարհները, ավելացել է ոստիկանության ներկայությունը։ Հարյուրավոր ոստիկաններ Նյու Յորքից տեղափոխվել են Վաշինգթոն։

Բենիամին Նեթանյահուի ելույթը Քոնգրեսում նախատեսված է Երևանի ժամանակով 22:00-ին։

CNN-ը հայտնել է, որ ցանկապատեր են տեղադրվել Սպիտակ տան մոտ, ուր Նեթանյահուն պետք է այցելի հինգշաբթի օրը՝ հանդիպելու Ջո Բայդենի հետ։

Նախօրեին Քափիթոլիումի ոստիկանությունը ձերբակալել էր ավելի քան 200 ցուցարարի, ովքեր գրավել էին Քոնգրեսի շենքի գլխավոր դահլիճը՝ բողոքելով Նեթանյահուի սպասվող ելույթի դեմ։ Ըստ բողոքի ցույցի հետևում կանգնած երկու հրեական կազմակերպությունների, ձերբակալվածների թվում կան րաբբիներ, Հոլոքոստը վերապրածների ժառանգներ, ուսանողներ, իսրայելցիներ և ամերիկացիներ: