«Ճիշտ էր Տիրան թագավորը, որ հրամայել էր սպանել Հուսիկ կաթողիկոսին». Կ. Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է. «Շատ պատմաբաններ հավաստի չեն համարում պատմիչի այն վկայությունը, որի համաձայն՝ Պապ թագավորը թունավորել է Ներսես Մեծին։
Օրինակ, ես հավաստի եմ համարում այդ տեղեկությունը, ավելին՝ պնդում եմ, որ լավ է արել, ճիշտ է արել։ Ճիշտ էր արել նաև Տիրան թագավորը, երբ հրամայել էր բրածեծ անելով սպանել Հուսիկ կաթողիկոսին։
Բայց, ամեն դեպքում, ամենավառ երևակայությունն ունի Լևոն Բ-ն, որը սկզբում ձերբակալում, այնուհետև ժայռից ցած է գլորում Գրիգոր 5-րդ կաթողիկոսին։ Հենց այս պատճառով էլ կաթողիկոսը ստանում է Քարավերժ անունը, այսինքն՝ ժայռից ցած գլորված։
Իհարկե, սրանք երեք խիստ տարբեր իրադարձություններ են, որոնց մասին անհրաժեշտ է առանձին-առանձին խոսել։ Բայց երեքի պարագայում էլ եկեղեցին կաթողիկոսների գլխավորությամբ հանդես է եկել պետության դեմ՝ ստանալով իր արժանի պատիժը։
Ի դեպ այնպես չի, որ ես խրախուսում եմ սպանությունը, պարզապես միջնադարյան արժեհամակարգին և բարոյական ընկալումներին պետք չի 21-րդ դարի աչքերով նայել։
Վերջում միայն ուզում եմ ձեր ուշադրությունը կենտրոնացնել մի հետաքրքիր փաստի վրա։ Ուժեղ պետության գաղափարի խորհրդանիշ Պապ թագավորին քննադատող ոմն Վարդանիկ Գյումրիում Աշոտ 3-րդ Ողորմածին նվիրված մի հակաէսթետիկ արձանիկ է կանգնեցրել։ Իսկ Աշոտ Բագրատունին հատկապես հայտնի է երկու կարևոր փաստերով, առաջինը՝ եկեղեցաշինությամբ, իսկ երկրորդը՝ իր անվճռական և թույլ ներքին քաղաքականությամբ, ինչի հետևանքով Հայկական պետությունը թուլացավ, մասնատվեց ու սկսեց աստիճանաբար քայքայվել։
Ահա սա է այդ կիսագրագետ մարդկանց աշխարհայացքը»։