Ամփոփվել է «Ոսկե Ուրարտու» ամենամյա կինոփառատոնը

Նոյեմբերի 4-ին Ռուս-Հայկական (Սլավոնական) համալսարանում տեղի է ունեցել սկսնակ ռեժիսորների «Ոսկե Ուրարտու» ամենամյա երրորդ փառատոնի մրցանակաբաշխությունը։ Ժյուրիի կազմում էին Երևանի Գեղարվեստի պետական քոլեջի դասախոս, դոցենտ Համլետ Թադևոսյանը, ՀՀ պետական մրցանակի դափնեկիր, կինոռեժիսոր Վահե Գևորգյանցը և «Ոսկե Ուրարտու» կինոփառատոնի հիմնադիր-տնօրեն Ռևիկ Թովմասյանը։

Մրցանակաբաշխությանը մասնակցում էր 5 ֆիլմ Իսպանիայից, ԱՄՆ-ից, Մեծ Բրիտանիայից, Ֆրանսիայից և Հնդկաստանից՝ ընտրված աշխարհի 48 երկրներից ուղարկված 527 ֆիլմերից։

Առաջադրված երկու անվանակարգերում հաղթել են Հնդկաստանից և Իսպանիայից ուղարկված ֆիլմերը․ ռեժիսորներ Շահիդ Քամալի Take the chocolate ֆիլմը և Ժավի Նավարրոյի I՝ve just head a dream ֆիլմը։

Ըստ փառատոնի նախընտրական ժյուրիի ղեկավար Արտակ Մուսայելյանի՝ Ոսկե Ուրարտուն հիմք է դրել ստեղծելու համար մի հարթակ, որտեղ ողջ աշխարհի պրոդյուսերները կկարողանան թարմ հայացքով և նոր եռանդով ռեժիսորներ գտնել։