Նախարարությունների աշխատակիցները ցանկանում են հանդիպել վարչապետի հետ

Կառավարության շենքի մոտ հավաքված Մշակույթի և Սփյուռքի նախարարությունների աշխատակիցները Կառավարության ներկայացուցչին հանձնեցին իրենց բողոք-նամակը և հորդորեցին, որ օպտիմալացման որոշումը վերանայվի, քանի որ այն առանց հանրային քննարկման է ընդունվել: Նրանք նաև ցանկություն հայտնեցին հանդիպել Ն. Փաշինյանի հետ՝ մտահոգությունները տեղում ներկայացնելու համար: «Կփոխանցվի, կզեկուցվի և արդեն գրավոր պատասխան կտրվի»,- գործադուլ իրականացնող աշխատակիցներին ասաց Կառավարության աշխատակազմի քաղաքացիների ընդունելության և դիմումների քննարկման վարչության պետ Ալեքսանդր Ղազարյանը:

Ավելի վաղ տեղեկացրել էինք, որ նախատեսվում է 17 նախարարություններից թողնել 12-ը։ Լուծարվելու է սփյուռքի նախարարությունը։ Տրանսպորտի, կապի ու տեղեկատվական տեխնոլոգիաների նախարարությունը կդառնա կապի ու բարձր տեխնոլոգիաների նախարարություն։ Տնտեսական զարգացման ու ներդրումների և գյուղատնտեսության նախարարությունները կմիավորվեն։ Աշխատանքի ու սոցիալական հարցերի նախարարությունը կմիանա տարածքային կառավարման ու զարգացման նախարարությանը։ Մշակույթի, սպորտի ու երիտասարդության նախարարությունները կմիավորվեն կրթության և գիտության նախարարությանը։