Մալախովը Ջիգարխանյանի նախկին կնոջ դեմ ցուցմունք է տվել

ԽՍՀՄ ժողովրդական արտիստ Արմեն Ջիգարխանյանի մտերիմ ընկեր բժիշկ Արամ Հակոբյանը հարցազրույց է տվել «Комсомольская правда» պարբերականին և պատմել արտիստի նախկին կնոջ՝ Վիտալինա Ցիմբալյուկ Ռոմանովսկայայի դեմ դատական գործի մանրամասների մասին:

«Վիտալինան պնդում է, որ տեսագրություն չի հանձնել հեռուստատեսությանը, որ, իբր դա արել է ուրիշ մեկը: Սակայն ինձ հայտնեցին, որ Անդրեյ Մալախովին կանչել են քննչական կոմիտե, և նա ցուցմունք է տվել այն մասին, որ Վիտալինան ինքն է բերել հեռուստաեթերի համար տեսագրությունները՝ դրա դիմաց վարձատրվելով»,- պատմել է Արամ Հակոբյանը:

Ջիգարխանյանի ընկերը նաև հայտնել է, որ ինքը ևս մտադիր է ցուցմունք տալ իրավապահ մարմիններին, քանի որ նրա մոտ 3 տեսագրություն կա, որոնք Վիտալինան իրեն է ուղարկել դեռևս 3 տարի առաջ:

Նշվում է, որ խոսքը Մալախովի հաղորդման ժամանակ ցուցադրված Ջիգարխանյանի անձնական տեսագրությունների մասին է, որոնց տրամադրումը Վիտալինան հերքում է: