«Պարզվում է՝ 3 տարեկան երեխայի անձնագիրը փոխել հնարավոր չէ»․ Հովսեփ Կուբատյան

Երևանի ավագանու «Ազգային առաջընթաց» խմբակցության անդամ Հովսեփ Կուբատյանի ֆեյսբուքյան գրառումը. «Համերգ արեցին, հրապարակում ցուցադրություն, վարչապետին անձնագիր տվեցին, մի խոսքով ծնգլահան արեցին նոր անձնագրերով, բայց պարզվում է 3 տարեկան երեխայի անձնագիր փոխարինել հնարավոր չէ։
Նախ ՀայՓասի կայքում չկա ոչ մի ինֆորմացիա անչափահասների անձնագրավորման մասին, ասենք, բիոմետրիա հանձնում են, թե ոչ։
Հեռախոսահամարը հասանելի չէ։ Այսինքն՝ բոլոր օպերատորները, եթե իրանք կան, զբաղված են։ Հետադարձ զանգի հնարավորություն չկա։
Երբ փորձում ես նախագրանցվել, գրում է ինչ-որ անհեթեթ բան ու չես կարողանում նախագրանցվել։
Գնացի հասա գրասենյակ ու պարզվում է, որ ծրագրային սխալ կա, անձնագիրը փոխել հնարավոր չէ։ Ավելի պարզ ասած, էդ մասը չէին նախատեսել, որ 3 տարեկան երեխայի անձնագրի ժամկետը կարող է լրանալ և պետք է նոր անձնագիր ստանալ։
Իմ կողմից տեղեկացնեմ, որ մինչև 6 տարեկան երեխաները մատնահետք չեն հանձնում։ Այս էլեմենտար ինֆորմացիան ոչ մի տեղ չկա։
Նիկոլ Փաշինյանի ասած՝ ամեն բարեփոխում հանդիպում է իր խնդիրներին, որոնք կլուծվեն, թե չէ ու երբ կլուծվեն՝ ոչ մեկ չգիտի, նույնիսկ ՀայՓասի գրասենյակում»։