«Մեր թիրախն է վիզաների ազատականացումն ունենալ 2029-ին». Նիկոլ Փաշինյան

Նիկոլ Փաշինյանը «ԵՄ ընդլայնման գագաթնաժողով 2026»-ի շրջանակում՝ պատասխանելով Euronews-ի հարցին, թե երբ է սպասվում ՀՀ-ի՝ ԵՄ անդամակցության համար դիմումի ներկայացումը, ի թիվս այլնի, ասել է. «Գիտեք՝ ես չգիտեմ՝ որքանով դա իրատեսական է, բայց հաջորդ տարին կարող է իրատեսական լինել, 2028-ը կարող է իրատեսական լինել, բայց հիմա մենք կենտրոնացած ենք վիզաների ազատականացման երկխոսության վրա, և մեր թիրախն է վիզաների ազատականացումն ունենալ 2029 թվականին, և դա հերթական շատ կարևոր փուլը կլինի ԵՄ-ի հետ մեր հարաբերությունների զարգացման գործընթացում։

Բայց մենք կարող ենք ասել, որ սկսել ենք գործընթաց, որը մեզ կբերի վերջնական որոշման՝ Եվրոպական միությանն անդամակցելու դիմում ներկայացնելու մասին։ Որովհետև հիմա, իսկ սա շատ կարևոր է, Հայաստանի և Եվրոպայի բարձրաստիճան պաշտոնյաները համաձայնում են մեկ շատ կարևոր կետի շուրջ. ՀՀ-ի և ԵՄ-ի միջև հարաբերությունները ներկայումս այն ամենաբարձր կետում են, որին երբևէ հասել ենք»։