Չնայած պատժամիջոցներին` Լավրովը մեկնում է ԱՄՆ

Ռուսաստանի արտաքին գործերի նախարար Սերգեյ Լավրովը այս շաբաթ մեկնում է Միացյալ Նահանգներ՝ մասնակցելու G20-ի արտաքին գործերի նախարարների հանդիպմանը, ճեպազրույցի ժամանակ հայտարարել է Ռուսաստանի արտաքին գործերի նախարարության խոսնակ Մարիա Զախարովան։

«Արտգործնախարար Սերգեյ Լավրովը կգլխավորի մեր պատվիրակությունը G20-ի նախարարական հանդիպմանը։ G20-ը ներկայում նախագահում է Միացյալ Նահանգները, և այս ձևաչափով նախարարական հանդիպումը տեղի կունենա հոկտեմբերի 30-ից 31-ն Ատլանտայում, ԱՄՆ», - ասել է Զախարովան։

Bloomberg-ը, մեկնաբանելով այս տեղեկատվությունը, նշում է, որ «Լավրովը, որը ենթարկվում է միջազգային պատժամիջոցների, կլինի Կրեմլի վերջին ներկայացուցիչը, որը կայցելի Միացյալ Նահանգներ՝ Վաշինգթոնի և Մոսկվայի միջև կապերի ամրապնդման ֆոնին։ Ֆինանսների նախարար Անտոն Սիլուանովը, որը նույնպես պատժամիջոցների տակ է, սեպտեմբերին մասնակցել է G20-ի ֆինանսների նախարարների հանդիպմանը Հյուսիսային Քարոլինայում և զուգահեռաբար բանակցություններ է վարել ԱՄՆ-ի ֆինանսների նախարար Սքոթ Բեսենթի հետ»։

Ռուսաստանի արտաքին գործերի նախարար Սերգեյ Լավրովը գտնվում է ԱՄՆ-ի անձնական պատժամիջոցների տակ 2022 թվականի փետրվարից՝ Ուկրաինայի դեմ Ռուսաստանի պատերազմի սկսվելուց կարճ ժամանակ անց։ Պատժամիջոցները ներառում են ԱՄՆ-ում բոլոր ակտիվների սառեցում և ամերիկացի քաղաքացիների ու ընկերությունների համար նրա հետ գործարքներ կնքելու արգելք։