«Զինվորական հանցագործություն` Էջմիածնի զինկոմիսարիատում». Աբրասիմ Աթոյան

Փաստաբան Աբրասիմ Աթոյանը ֆեյսբուքյան իր էջում գրել է. «ՍԱ ԻՆՉ Է, ԵԹԵ ՈՉ ՊԱՏՎԻՐՎԱԾ ՊԱՏԻԺ:
Հայաստանում իրականությունը այլ է: Օրենքն այլ բան է նախատեսում, կառավարության որոշմամբ այլ բան է նախատեսված, սակայն Պաշտպանության Նախարարությունն ու ենթակա կառույցները որոշել են լիովին ոտնահարել օրենքը: Օրենք պահպանողները, բազմիցս օրինապահություն քարոզողները իրենք են օրենքը խախտում:
Մի գործով պատժի կրման մեջ գտնվող, այլ քրեական վարույթներով քրեական հետապնդման ենթարկվող անձին զորակոչելը, հարգելիներ, օրենքի կոպիտ խախտում է որով ոտնահարվում են մարդու իրավունքներն ու օրինական շահերը:
Հրաժարվելը կամ ուղղակի զորակոչվողի ամբողջական տվյալները, այդ թվում նաև քրեական հետապնդման ենթարկվելու վերաբերյալ, չճշտելը զինվորական հանցագործություն է՝ նախատեսված ՀՀ քրեական օրենսգրքի 550-րդ հոդվածով:
Եվ այս ամենը, հե՛նց այս պահին տեղի է ունենում ոչ ավել, ոչ պակաս քան Էջմիածնի զինկոմիսարիատում:
Օնիկ Վարդանի Հարությունյանին մի օր ասում են մենք իրավունք չունենք քեզ զորակոչելու, հաջորդ օրը զորակոչում են՝ առանց ստուգելու, որ վերջինս քրեական հետապնդման տակ է գտնվում նաև գտնվում է պատժի կրման մեջ»: