Ֆրանսիայում փոթորկի պատճառով ավելի քան 160 հազար տնային տնտեսություն մնացել է առանց էլեկտրականության

Ֆրանսիայում «Օսթին» փոթորկի պատճառով շուրջ 161 հազար տնային տնտեսություն մնացել է առանց էլեկտրաէներգիայի։ Տարերքն առավելապես հարվածել է Բրետանի, Նորմանդիայի և Լուարայի երկրամասերին։ Այս մասին հայտնում է Le Figaro-ն՝ հղում կատարելով էլեկտրացանցերի օպերատոր Enedis ընկերությանը։

Մասնավորապես, Բրետանում առանց էլեկտրաէներգիայի է մնացել 128 հազար տնային տնտեսություն, Լուարայի երկրամասում՝ 19 հազար, իսկ Նորմանդիայում՝ 14 հազար։

Հաղորդվում է, որ փոթորիկն այսօր կանցնի Լա Մանշ նեղուցով՝ ուժգին քամիներ բերելով Ֆրանսիայի հյուսիս-արևմուտք։ Հատկապես բարդ եղանակային պայմաններ են սպասվում Բրետանի և Նորմանդիայի ափամերձ շրջաններում, որտեղ քամու պոռթկումների արագությունը կհասնի 100-130 կմ/ժ-ի, իսկ բաց ծովահրվանդաններում՝ 140-150 կմ/ժ-ի։ Ներկայումս Ֆրանսիայի 23 դեպարտամենտում ուժեղ քամու վտանգի պատճառով գործում է նարնջագույն նախազգուշացում։