«Իրանից մեծ քանակությամբ գազ ստանալ հնարավոր է, բայց լծակները Ռուսաստանի ձեռքում են»․ Տիգրան Դավուդյան

Իրանագետ Տիգրան Դավուդյանի ֆեյսբուքյան գրառումը․ «Արդյո՞ք հնարավոր է Իրանից մեծ քանակությամբ գազ ստանալ. հնարավոր է, բայց լծակները Ռուսաստանի ձեռքում են։ Իրան-Հայաստան գազատար խողովակը Գազպրոմի սեփականությունն է. իրանական ներմուծվող գազի ծավալի ավելացումը պետք է համաձայնեցվի Գազպրոմի հետ։ Կարելի է Իրանի տարածքով բերել թուրքմենական գազ (Swap եղանակով), բայց դարձյալ Հայաստան է մտնելու Գազպրոմին պատկանող խողովակով։ Երկարատև ծրագիր մշակելով կարելի է տեղադրել նոր խողովակ և Իրանից մեծ քանակությամբ գազ ստանալ, այդ դեպքում հետևյալ հարցերը կառաջանան. իրանական գազի հիմնական գնորդ Թուրքիան ու Իրաքը հազար խորանարդի համար վճարում են մոտ 300 ԱՄՆ դոլար և երրորդ երկրին զեղչի դեպքում կբողոքեն (հատկապես Թուրքիան)։ Մենք հիմա ռուսական գազը գնում ենք 177 դոլարով։ Առավել հավանական է, որ Իրանն ու Հայաստանը կանխիկ գործարքի փոխարեն ավելացնեն գազ էլեկտրաէներգիայի դիմաց բանաձևի ծավալը, որպեսզի փոխանակման գինը գաղտնի մնա։ Մնաց նաև երեք խնդիր. Իրանի գազի կալորիականության պակասը, ամերիկյան պատժամիջոցները և Իրան֊Ռուսաստան բարեկամական կապը»։