Միլանում ավելի քան 200 մարդ է ձերբակալվել

Կյանքի թանկացումից և ծառայությունների որակից դժգոհ հարյուրավոր մարդիկ են հանգստյան օրերին մասնակցել Միլանի կենտրոնում տեղի ունեցած անկարգություններին։ Ոստիկանություն է տեղափոխվել ավելի քան 200 մարդ, մեծ մասն անչափահասներ, հայտնում է RAI News 24-ը։

Հեռուստաալիքի հաղորդմամբ՝ բախումները սկսվել են շաբաթ օրը։ Կիրակի կեսօրին Միլանի Մայր տաճարի հրապարակում՝ Պիացցա դել Դուոմոյում, ըստ լրատվամիջոցների գնահատականների, հավաքվել է մինչև 2 հազար մարդ։ Նրանց մեծ մասը սև հագուստով է եղել, ոմանք՝ գլխարկներով և դեմքները ծածկած։ Ցուցարարները կոտրել են խանութների և ռեստորանների ցուցափեղկերը, վնասել փողոցային նստարանները, աթոռներ և քարեր նետել, ինչպես նաև հրկիզել աղբամանները։ Ոստիկանությունը պատասխանել է հատուկ միջոցների և ջրցան մեքենաների կիրառմամբ։ Օրվա ավարտին իրավիճակը վերահսկողության տակ է վերցվել։

Միևնույն ժամանակ, ինչպես նշում են լրատվամիջոցները, Իտալիայի վարչապետ Ջորջա Մելոնին մտադիր է այսօր խորհրդակցություն անցկացնել հասարակական կարգի պահպանման հարցերով։