«Երևանի քաղաքապետարանը չունի կայանման կանոնների վերահսկման առանձին ծառայություն». Պեդրո Զարոկյան

Երևանի քաղաքապետարանի ավագանու ընդդիմադիր անդամ Պեդրո Զարոկյանը ֆեյսբուքյան իր էջում գրել է. «Երևանում կայանման կանոնների խախտումները պատշաճ կերպով վերահսկելու և տուգանքները կիրառելու անկարողությունը պայմանավորված է նրանով, որ Երևանի քաղաքապետարանը չունի կայանման կանոնների վերահսկման առանձին ծառայություն և ստիպված է ապավինել ոստիկանությանը, որը բավարար թվով աշխատակիցներ չունի՝ վերահսկողությունն ամբողջությամբ իրականացնելու համար։ Ավելին, քաղաքի կայանատեղիներում, օրինակ՝ Օպերայի ստորգետնյա ավտոկայանատեղիում, քաղաքապետարանը նշում է, որ օրենքով իրավասու չէ տուգանել ապօրինի կայանման համար։
Վերջին մի քանի տասնամյակների ընթացքում եվրոպական և ամերիկյան երկրների մեծ մասը հրաժարվել է կայանման կանոնների ամենօրյա վերահսկողությունն ավանդական ոստիկանական ուժերի միջոցով իրականացնելու մոտեցումից՝ նախապատվությունը տալով քաղաքացիական ծառայողներին, համայնքային մասնագիտացված վերահսկողության ծառայություններին կամ մասնավոր կապալառուներին։ Մեծ քաղաքների մեծ մասում կայանման կանոնների խախտումների համար տուգանքները կիրառում են մասնագիտացված համայնքային ծառայողները, որոնք աշխատում են քաղաքային համապատասխան ստորաբաժանումներում, օրինակ՝ տրանսպորտի վարչությունում կամ կայանման վերահսկման առանձին ծառայությունում։ Այս աշխատակիցները զինված ոստիկաններ չեն և չունեն ձերբակալություններ կատարելու իրավասություն։
Երևանի քաղաքապետարանը պետք է ունենա կայանման կանոնների վերահսկման առանձին ծառայություն, որը կկարողանա տուգանել ապօրինի կայանման համար»։