«Խախտված է աշակերտի և ուսուցչի ճիշտ մոդելը». Աննա Ավետիսյան
81
Այսօր, 21:36
Երևանի ավագանու «Մայր Հայաստան» խմբակցության անդամ Աննա Ավետիսյանի ֆեյսբուքյան գրառումը. «Ի՞նչ է կատարվում մեր դպրոցներում։ Մի դպրոցում մի քանի տղա սեռական բռնության են ենթարկում աշակերտուհուն, մյուսում՝ աշակերտները բռնության են ենթարկում իրենց դասընկերոջը, իսկ մեկ այլ դպրոցում ուսուցչի խիստ մոտեցումն ավարտվում է նրանով, որ մանկավարժը մեկ օր անցկացնում է ոստիկանության բաժնում։ Սա լուրջ ահազանգ է մեր կրթական համակարգում տիրող բարոյահոգեբանական մթնոլորտի, դաստիարակության որակի և պատասխանատվության ինստիտուտների մասին։ Խախտված է աշակերտի և ուսուցչի ճիշտ մոդելը։ Այսօրվա կրթական համակարգը չի կարողանում ապահովել ո՛չ աշակերտի անվտանգությունը, ո՛չ էլ ուսուցչի մասնագիտական արժանապատվության պաշտպանությունը՝ որի բարձր նիշը նա պետք է պահի։ Արդյունքում տուժում են բոլորը։ Մի կողմից՝ ունենք բռնության ենթարկվող երեխաներ, մյուս կողմից՝ հեղինակազրկված մանկավարժներ, իսկ այս երկուսի միջև՝ պատասխանատվությունից հաճախ խուսափող համակարգ։ Եվ այս ամենի հետևանքով ձևավորվում է մի սերունդ, որի մի հատվածի համար ուժն ու անհանդուրժողականությունն դառնում է ինքնահաստատման խեղաթուրված չափանիշ։ Անպատիժ մնացած բռնությունը վաղը կարող է վերածվել հասարակական չարիքի։ Իսկ այս ամենի ֆոնին պետությունը, կարծես, իր առաջնահերթությունները տեսնում է համերգներ ու միջոցառումներ կազմակերպելով»:
