««Գազպրոմը» և NIGC-ն քննարկում են դեպի Իրան գազատարի երթուղու հարցը»․ Սաիդ Թավաքոլի

Իրանի գազային ընկերությունը (NIGC) և «Գազպրոմը» քննարկում են ռուսական գազի մատակարարման խողովակաշարի երթուղու հարցը և գնի ձևավորման մեխանիզմները։ Այս մասին լրագրողներին հայտնել է Իրանի նավթի փոխնախարար, NIGC-ի ղեկավար Սաիդ Թավաքոլին։

Նա նշել է, որ 2024 թվականին «Գազպրոմի» և NIGC-ի միջև Իրան ռուսական գազի մատակարարումների կազմակերպման հնարավորությունների ուսումնասիրման վերաբերյալ ռազմավարական հուշագրի ստորագրումից հետո ընկերությունները սկսել են տեխնիկական և մասնագիտական բանակցությունները։

«Հուշագրի տարբեր բաժիններին վերաբերող բոլոր պայմանավորվածություններն իրականացվել են։ Մնում են միայն [գազատարի] երթուղու որոշման, ինչպես նաև [ռուսական գազի] գնման և վաճառքի գնի ձևավորման հարցերը։ Հուսով ենք՝ այս երկու-երեք հարցերի կարգավորումից հետո ամեն ինչ կլուծվի»,- հավելել է նա։

Ընկերության ղեկավարը նշել է, որ Իրանը, ունենալով աշխարհագրական եզակի դիրք, կարող է կապող օղակ դառնալ Հարավային Կովկասի և Պարսից ծոցի երկրների միջև։