«Նրանք սկսեցին, մենք պատասխանում ենք»․ Պուտինը՝ ռուսական օբյեկտներին Ուկրաինայի հասցրած հարվածների մասին

Ռուսաստանի իշխանությունները չէին սպասում, որ Ուկրաինան հարվածներ կհասցնի Wildberries և Ozon առցանց առևտրի հարթակների պահեստներին։ Այս մասին հայտարարել է ՌԴ նախագահ Վլադիմիր Պուտինը՝ ելույթ ունենալով «Դելովայա Ռոսիա» համագումարում։

«Ես տեղյակ եմ այն խնդիրներից, որոնց մասին դուք խոսեցիք: Ցավոք, մենք բախվել ենք հակառակորդի գործողություններին մեր հարթակների՝ Wildberries-ի և Ozon-ի դեմ։ Ի դեպ, նրանք մշտապես որոշակի քայլեր են ձեռնարկում, որոնք, հավանաբար, պետք է կանխատեսեինք, բայց կարծում էինք, որ այդքան հեռուն չեն գնա։ Բայց գնացին»,- ասել է Պուտինը՝ արձագանքելով Wildberries ընկերության հիմնադիր Տատյանա Կիմի ելույթին, որը հիշատակել էր Ուկրաինայի հարվածները ընկերության պահեստներին։

Պուտինի խոսքով, երբ Ռուսաստանը «սկսում է պատասխան հարվածներ հասցնել», ուկրաինական կողմը դիմում է իր «հովանավորներին»՝ խնդրելով ազդել Ռուսաստանի վրա և կասեցնել նրա գործողությունները։ Նրա խոսքով՝ նույն իրավիճակն է եղել նաև էներգետիկ օբյեկտների դեպքում։

Պուտինը հայտարարել է, որ Ռուսաստանն արդեն սկսել է պատասխանել այդ հարձակումներին։ «Նրանք առաջին քայլն արեցին։ Մենք սկսեցինք պատասխանել»,- ասել է Ռուսաստանի նախագահը։