«Երևանը պետք է արժանապատիվ լինի ամեն օր՝ առանց փոշու ու կեղտի»․ Նաիրի Սարգսյան

«Հայաստանը ես եմ» նախաձեռնության ղեկավար Նաիրի Սարգսյանը ֆեյսբուքյան իր էջում գրել է․ «Երևանը գույն ունի, բույր ունի, ձայն ունի։ Ունի իր արևը, իր վարդագույն տուֆը, իր բակերը, իր սրճարանները, իր աղմուկն ու լռությունը։ Երևանը շունչ ունի։
Երևանը միայն շենքերի ու փողոցների ամբողջություն չէ։ Քաղաք է, որն ունի հիշողություն, բնավորություն, դեմք ու դիմագիծ։
Տոն օրերին այս ամենն ավելի տեսանելի է․ լույսեր, մարդկանց բազմություն, համերգներ։ Բայց Երևանը չի կարող գեղեցիկ լինել միայն տոնական լույսերի ներքո։
Երևանը պետք է արժանապատիվ լինի ամեն օր՝ առանց փոշու ու կեղտի, անվերջ խցանումների ու խլացնող աղմուկի, առանց այնպիսի կառուցապատումների, որոնք ջնջում են քաղաքի պատմական դեմքը, և առանց հանրային տարածքների կորստի։
Երևանը պետք է ապրելու համար հարմար լինի նաև երկուշաբթի առավոտյան, ձմռանը, ամռան շոգին, խցանման մեջ, բակում, մետրոյի ճանապարհին, հին շենքերի կողքին։ Երևանի իրական չափանիշը տոնական օրերի լույսերը չեն։ Երևանի իրական չափանիշն այն է, թե ինչպիսի քաղաք ենք տեսնում, երբ հանգչում են լույսերը, և սկսվում է աշխատանքային ծանրաբեռնված օրը։
Երևանի դիմագիծը նաև Հայաստանի դեմքն է աշխարհին ներկայանալիս։ Երևանը պետք է ունենա իր ձայնն ու կշիռը տարածաշրջանում և աշխարհում, իսկ պաշտոնական Երևանի խոսքն ու դիվանագիտական ներկայությունը պետք է արտացոլեն մեր պետության արժանապատվությունը, ինքնիշխանությունն ու երկարաժամկետ շահերը։
Շնորհավոր, Երևան»։